Xedeak

Euskal Herriko Bakearen Aldeko Koordinakundearen jarduera guztiek azkeneko xede bat bilatzen dute, hots, gehiengoak nahi duen bakea eskuratu eta justizia zein gizatasuna handitu gizartean. Horretarako, honako xede hauek lortu nahi ditu:
· Hiritarron mobilizazioa handitzea eta indartzea. Sinesten dugu terrorismoa ezin daitekeela bigarren mailako arazotzat hartu, ezta gugandik urrun dagoen arazotzat ere, eta, hortaz, Bakearen Aldeko Koordinakundeak gizartearen zati handi batean sumatzen diren apatia, inhibizioa eta beldurra gainditzeko egiten du lan. Bakearen Aldeko Koordinakundearen jarduerak izan duen ezaugarri nagusia horixe izan da, hain zuzen ere, indarkeriaren gaitzespen sozialak publikoki adierazteko bide izatea.
· Gizartea kontzientziaraztea, indarkeriaren aurka eman beharreko erantzun baketsu baina tinko eta garbiaz duen erantzukizunaz jabetu dadin. Egoerak ez dira berez aldatzen, baizik eta egoerak bizi dituzten pertsonek aurre egiteko erabakia hartzen duten heinean, eta, euren konpromisotik, gauzak aldatzen saiatzen diren heinean. Horregatik, ezinbestekoa da gizartearen inplikazioa: ez da aski egoera txarto dagoela esatea. Mentalizazio-lana ezinbestekoa da gizarte baketua eta adiskidetua lortzeko.
· Instituzio publikoek indarkeria desagerrarazteko egiten duten lana legearen barnean eta giza eskubideak errespetatuz egiten ote den ikuskatzea. Bakearen Aldeko Koordinakundeak beti esan du instituzio demokratikoen jarduera legearen eta giza eskubideen errespetuaren barnean gauzatu behar dela erabat. Alde horretatik, Bakearen Aldeko Koordinakundeak publikoki salatu du eta salatzen du bide horretatik kanpo egindako guztia.
· Bakearen kultura sustatzea. Etorkizunean nabariak izango dira itxikeriak, erasoek eta terrorismoak utzitako ondorioak, eta horiekin bizi behar izango dugu. Hortaz, Bakearen Aldeko Koordinakundea oinarrizko adostasun sozial bat saiatuko da eraikitzen problematika horren inguruan, bakearen kulturaren euskarri moduan; ahalegin horiek giro horretan hazi eta gizarteratu diren haur eta gazteengana zuzenduko dira batik bat.